Löndun í fyrramálið.

Við erum á síðasta holinu þennan túrinn. Förum síðan til Vestmannaeyja og löndum. Makríllinn er vel haldinn, alltaf að stækka og fitna. Semsagt allt í þessu fína.

 

Höfnin, byggðin og  fleiri eyjar í baksýn. 

 

Jæja, er þetta ekki bara nokkuð góð mynd.

 

Makríll DNA

Við erum komnir með sjötíu tonn af góðum makríl. Þeir sem vilja vita hvar við erum er bent á viðeigandi vefsíðu. "marinetraffic.com". Svo segja fréttamiðlar að vísindamenn séu að rannsaka erfðamengi makrílsins okkar. Vilja jafnvel meina að hann sé ekki evrópskur. Og því eigi esb og nojarar ekkert í honum. Sem segir sig sjálft. Vér Mörlandar og frænur vorir Færeyingar, við eigum þann fisk sem vill koma í okkar sjó og fá sér eitthvað í gogginn. Og verða stór, feitur og sterkur af úrvals æti.

 

Nýmálaður. 

 

Þetta er Blátindur. Vonandi verður þessi gamli vertíðar og síldarbátur gerður upp. 

 

Fjárhirðirinn gáir til veðurs uppá bæjarhólnum.

Miðnæturblogg

Við komum til Vestmannaeyja klukkan fjórtán hundruð. Erum búnir að landa hundrað og fimmtíu tonnum. Fórum svo út aftur klukkan tuttugu og þrjú fimmtán. 

 

Þarna siglir einhver inn. 

 

Meira blogg á morgun. Vonandi. 

Byrjaðir á makríl.

Jæja, það var víst 4. maí sem síðast var bloggað.  En við erum búnir að vera í slipp í borg óttans og einnig hefur mikil viðhaldsvinna farið fram í Vestmannaeyjum. Við fórum frá Vestmannaeyjum klukkan níu í morgun og nú skal veiða makríl. Búnir að taka eitt hol og gekk það vel. Erum núna að fara að kasta aftur. Vonandi verður hægt að segja aflafréttir á morgun.

 

Þetta grjót er listaverk og heitir "Eyra á Eiði."

 

Friður í Friðarhöfn. 

 

Hann Eyþór á afmæli í dag. Þrjátíu og eins. Til hamingju með það. 

4. mai

Þá fer að styttast í þessum túr. Nokkur ker eftir tóm. Veður eins og best gerist. Enda komið sumar.

 

 Landsýn. Sjáið jökulinn loga. Segir í gömlu og góðu dægurlagi. Langt síðan þessi jökull logaði. Vonandi langt í að hann logi aftur.

 

Stórfiskahol. 

 

Pakksaddir matargestir. 

3. mai.

Það er kominn tími á smábloggg. Ekkert verið bloggað síðan fimmtánda mars. Apríl blogglaus mánuður. Við fórum út að kvöldi fyrsta maí. Og fórum í austur og erum að trolla sunnan Vatnajökuls. Í blíðskaparveðri og fiskirí í góðu meðallagi. Aflinn er samansettur af eintómum vænum gulum og bláum fiskum. Ekkert sem heitir undirmál lengur í landhelgi Íslands. Svo kvu einhverjir vitringar hafa friðað lúðuna. Og svartfugla. Hvað ætli verði friðað næst. 

 

Fyrir þá sem ekki vita hvaða fiskur þetta er, þá var þetta þorskur er hann lifði og synti í hafinu. En karlinn hann Óðinn segði að þorskur af þessari stærð væri talinn undirmálsfiskur í Lónafirði. Þar væri allt svo stórt. 

 

Þá er þoskurinn á fyrri myndinni kominn á sinn stað í einangrað fiskiker og Stjáni að fara að kafísa hann. 

 

Löndun ofl.

Við fylltum alla geyma af loðnu og fórum til Vestmannaeyja til að landa. Komum í land kl.0300 á þriðjudag. Biðum eftir að klárað væri landað úr Júpíter og Álsey. Færðum svo á löndunarbryggju og byrjuðum að landa kl. 0230 á miðvikudag. Löndun kláraðist kl 0130 í nótt og færðum við þá frá löndunarbryggju svo að Sigurður kæmist að í löndun. Semsagt mikið landað í Eyjum nú í lok vertíðar. Við eigum að fara einn túr enn og síðan verður skipt yfir á botntroll. 

 

Heimaklettur í morgunsól. 

 

Meiri morgunsól á kletta. 

 

Dekkþvottur. 

 

Ný sjónvarpskúla á uppleið. 

Fullfermi

Brælan gekk niður seinnipartinn í gær og við fórum út á flóann klukkan tuttugu. Fengum það sem á vantaði uppá fullfermi í þrem köstum. Og siglum nú sem ákafast í áttina að Vestmannaeyjum og verður þar  um þrjúleitið í nótt. 

 

Hér eru karlar á Bjarna Ólafs af Skaganum að leita að loðnu. Sem þeir fundu svo og köstuðu rétt hjá okkur.

 

Laugi á rannsóknarstofu skipsins við vísindastörf.

 

Stebbi G er áhugamaður um fjarstýringar, eins og sést.

 

Karlar í loðnutalningu. 

Bræla

Við fórum frá Vestmannaeyjum klukkan þrettánhundruð í gær. Það var skítabræla er við fórum út. Köstuðum svo þrisvar í morgun í Faxaflóanum. En Kári fór að blása betur og við komum okkur í var utan við Keflavík. Erum þar í vari ásamt fleiri skipum. Samkvæmt veðurspá á víst að vera vitlaust veður um allt land og miðin í nótt og kannski lengur.

 

Vindhraði 20 m/sek er verið var að dæla úr nótinni í morgun.

 

Fylgst með dælingu. 

 

Loðna, bjargvætturinn í dag. 

Sólgos.

Vegna sólgoss á á að vera mikið norðurljósasjóv í kvöld og nótt. Nú erum vér að landa í Vestmannaeyjum. Fullfermi af hrognafullri loðnu. Við fórum út í túrinn á mánudagskvöld. Fengum gefins afgang frá Júpíter og fylltum svo í þrem köstum. Það var skítabræla alla leiðina frá Breiðafirði til Eyja.

 

Hér er eitthvert skip í öldudal. 

 

Og það var þá sjálfur Sigurður hreppstjóri sem kom uppúr öldudalnum.

 

Svo sigldi hreppstjórinn að oss og kastaði.

 

Fyrst var síðutogarinn Sigurður með einkennisnúmer ÍS 33, síðan RE 4 ef ég man rétt. Og nú VE 15. Og búið að breyta honum í nótaskip fyrir löngu síðan. En eitt hefur aldrei breyst og það er skorsteinsmerkið.